قصة قصيرة حزينة!

هعمل انقلاب عسكري..

عطل يا بني الدستور المستفتى عليه شعبياً..

إسجن الرئيس المنتخب ومساعديه والوزراء بتوعه.. وكل إللي يتشددلهم..

برضه مش ساكتين..

اللي في مظاهرة اضربوه بالنار..

واللي في بيته صفوه في سريره..

وإللي مطارد اغتالوه وقولوا تبادل إطلاق نار..

وإللي في المعتقل امنعوا عنه العلاج لحد ما يموت..

أو اقتلوه تحت التعذيب.. عادي براحتكم..

لسة في ناس بتنطق!

هخفي أي حد قسراً رجالة وستات..

إيه ده.. مين دول؟

أسر مختفين ومحامين بيدوروا على المختفين!

أخفيهم هم كمان في حتة أسوأ من إللي مختفي فيها إللي هما بيدورا عليهم..

واقتلي واد أجنبي حلوية كدة عشان يعرفوا إني معلم على الكل جوة وبرة..

يا نهار أبوكوا أسود..

بقى إللي كانوا بيدعموني إمبارح بيعارضوني النهاردة..

لملي شوية العيال دي كلها وارميهم في المعتقل..

وإقتل أي حد صوته يعلى.. أو حتى ميعلاش.. كل شوية إقتل حبة..

إنت بتعمل إيه... إنت مجنون!!!!

لن أسمح للفاسدين بالوصول للكرسي ده.. ده أنا شقيان فيه..

اسجن أي ضابط يفكر.. يفكر بس..

لكن يا فندم ده كان رئيس أركـ...

هووووش إن شاء الله يكون مين.. يتحاكم عسكريا فوراً..

والقضاء الشامخ..

بص أنا عايز شغلك شفتات..

إعدامات - مؤبدات - تحفظ على أموال - إعدامات - نقض - إعادة محاكمات - قوائم إرهاب - مؤبدات - تحفظ - إعدامات..

زهقتوا.. إعملوا كوكتيلات في قضية واحدة..

وإللي يعطس يبقى إهانة القضاء.. اسجنوه..

مش عايز شبر فاضي في سجن.. ده أنا باني أكثر من 20..

المستشار إللي مش هيشوف شغله هسجنه يملى السجون دي بكرشه ده..

بقالي فترة مش سامع إعدامات ليه؟! هزعل..

إيه الدوشة دي..

الإعلام بينقل إللي بعمله.. اقطع الأذرع دي حتى ولو فيها أذرع بتاعتي..

واقفلي يابني القنوات والمواقع دي كلها..

ولملي شوية الصحفيين دول ارميهم في السجن..

إحنا ليه بقينا فقرا أوي.. الاقتصاد مش عاجبني حاله..

إلغي الدعم.. وإطبع فلوس.. إستلف من برة.. ومن جوة.. إستلف من برة تاني..

إيه ده مظبطتش.. إطبع فلوس... جرب كدة تستلف من برة بس من مكان أبعد شوية..

واقف ليه يا بني مش شغال.. إطبع فلوس يا باشمهندس طارق ميهمكش..

شكلكم كنتوا هتنسوني..

إقتل.. إعتقل.. إخفي قسراً.. وشوية المعتقلين إللي خرجتهم.. إعتقلهم تاني..

مين إللي بيكتب على صفحته على فيسبوك هناك ده؟

يا عبعال.. قانون بسرعة واتوصى..

ومتنساش تقول لطارق يطبع فلوس كمان.. وقول لوزير الداخلية ووزير الدفاع يقتلوا حبة كمان..

قولولهم يتوصوا بشمال سيناء..

عشان نخلص قصة التهجير دي بقى.. طالما السيناوية بيحبوا أرضهم قوي كدة أنا هدفنهم فيها..

هو الناس الملمومة هناك دي عند جمعيات خيرية.. مش أنا قفلتها؟!

لا يا فندم دي منظمات مجتمع مدني وحقوق إنسان..

حقوق.. وإنسان.. إنت دارس إللي بتقوله ده!

إقفل.. إعتقل.. إسجن..

فين سامح شكري.. قوله يطلع يهاجم الحاجات دي..

وقول لضياء رشوان زود من بيانات المؤامرة على ماسر والشائعات..

بصوا الأداء مش عاجبني.. تغيير وزاري..

عشان نجدد الدماء.. لنهدر المزيد من الدماء..

عايز بقى تصفيات جديدة..

إيه ده تصفيات لشباب في نفس المحافظات في نفس الأماكن في نفس الشهر بتاع السنة إللي فاتت..

إممم مش مهم.. المهم إقتل..

إنت بتطبع ولا مبتطبعش يا طارق؟!

طيب كمل طباعة يا حبيبي.. وانده على وزير النقل قوله يزود تذاكر المترو..

إيه ده أنا لسة مزودها.. قوله يطلع يقول للناس هنزودها تاني قريب..

وإنت إطبع وركز على الورقة أم 200..

بلاش 50 عشان مدبولي عايز يدفع فلوس للمقاولين إللي بيبنوا المشروعات القومية العظيمة بتاعتي..

إيه الطوابير دي كلها.. طماطم وبطاطس صح.. يلا خلي الداخلية تاكل عيش

لا يا فندم دي ناس مقدمة على تأشيرات سفر للخارج وبتعمل تصاريح عمل

يالا ربنا يوفقهم.. زود بقى رسوم جواز السفر.. ده جواز سفر أم الدنيا..

إمممممممم..

هو مش برضه التعليم مش بيعمل حاجة في وطن ضايع..

طبعاً يا فندم..

طيب ما نشتري شوية سلاح من كام دولة كدة عشان يبقى الوطن صايع..

وزود الرافال عشان ماكرون مقموص..

وخد لنا قرض بقى على حس تطوير البنية التحتية عشان عايز أعمل قصر العلمين كله رخام..

مين ده..؟!

مين إللي لسة بيسأل "هل مصر فقيرة حقا؟".. ما أنا جاوبت من بدري..

إحنا أمة العوز.. أمة الفقر.. إنتوا فقرا أوي.. أوي.. أوي..

ده يا فندم أكاديمي وخبير اقتصادي.. جايب بالتقارير الرسمية إننا أغنياء أوي..

إعتقلوه..

هو وصاحب المطبعة وصاحب محل الورق وصاحب القهوة إللي بينزلهم شاي وهم شغالين..

وصاحب المحل إللي القهوة بتجيب منه الشاي..

البلد حالها مش عاجبني.. مش عارف ليه..

مع إني متابعها من وأنا عندي 3 سنين عشان ملبسهاش في الحيط!

.

.

.

إيه الزهق ده..

لما أروح شرم الشيخ أركب عجل!