غنيم والشريف.. مصر بين الطيب والشرير!

بما إن الحملة على "عبد الله الشريف" والهجمة عليه عالية أوي، ومترتبة صح، ومصروف عليها والصرف باين بصراحة.

فشخصياً.. أنا مصدق كل كلمة اتقالت على "عبد الله".

أيوة هو نسوانجي، ومن عندي كمان خمورجي وبودرجي!

فـ أيوة بقى عايزين إيه؟

هنسى أنا بقى الأرض اللي اتباعت والتانية اللي اتهجرت!

هنسى أنا بقى الديون والقروض اللي بقينا مش لاحقين نحسبها!

إيه ده!!.. عبد الله بتاع نسوان!

آه عشان كده بقى التعليم في بلدنا بايظ والصحة زي الزفت والجنيه غرقان والفساد في كل حتة!!!!!

فكر منك ليه وقولي..

في واحد بس من اللي هاجم "عبد الله" طلع "ناقش" الكلام والموضوعات اللي بيتكلم فيها.. ولا بينالوا من شخصه.. لو كل الكلام على شخصه، فهو وحش حضرتك هو مجرم وسافل ومنحط، خلينا في كلامه صح ولا غلط؟! حصل ولا محصلش؟!

سؤال برضه محيرني ومخلي في هواجس جوايا..

إيه دخل "المصداقية" بإنه بتاع "بنات"؟!

يعني إنتوا "ياللي بتهاجموه" بتوع "ذكور" عشان كده المصداقية بتاعتكم حلوة؟!

فالمفروض بقى إني أسيب كل هموم ومشاكل بلدي وأروح أركز في محادثات واتساب وفيديوهات بين واحد وواحدة!

هتقولي لأ.. عندك..

ما هو اللي بيقدم نفسه على إنه "المعارض" اللي خايف على البلد، وعامل فيها شيخ وهو بتاع بنات!

أول حاجة عبدالله لا شيخ ولا في يوم قال إنه شيخ.

تاني حاجة أيوة برضه إيه دخل إنه (بيعارض أو بينتقد أوضاع سياسية أو اقتصادية أو بيتكلم في تاريخ) في إنه بتاع بنات يعني؟

ما هو وائل غنيم رأس حربة في الهجوم الأخير على "عبد الله"، وبيقول أنا بحب مصر زي ما عبد الله بيقول بالظبط، وإنتوا بتسمعوا من وائل وبتقولوا عليه بطل.

رغم إن وائل حشاش وزاني! وهو بنفسه اللي اعترف وقال أنا خنت مراتي مع واحدة تانية.. يعني هو اللي قال وكشف ستر نفسه، لا حد اتجسس عليه ولا أجبره يقول، هو شاف إنه عايز يقول فقال.. وبصراحة تامة.. براحته، وائل كإنسان من حقه يعمل اللي هو عايزه في حياته الشخصية ملناش دخل بيها، يحلق يقلع يلبس يزني يشرب يسافر يتبرع لإنقاذ حيوان الكوالا من الانقراض يلعب باليه أو يطور برامج أو يغزو الفضاء.. واحنا مالنا؟! "حياته الشخصية".

بالظبط.. نفس الأمر ينطبق على "عبد الله" وعلى أي حد..

لكني أختلف واتفق مع وائل في أمور تتعلق ببلدنا مصر، عادي براحتي، لكن حياته وتصرفاته الشخصية دي بتاعته هو مش بتاعتنا.

طيب لو واحد ولا واحدة من اللي بيهاجموا عبد الله وغيره، اتسربله مقطع جنسي، ولا مكالمة ولا صورة من محادثة، هو كده هيبقى مجرم ومنسمعش منه تاني؟! وخلي بالكم إنتوا مش هتبقوا عندهم أعز من دول.

دول يبقوا:

* يعني لما عضو البرلمان هيثم الحريري اعترض على "تعديلات دستورية" وهو أمر من صميم عمله وحقوقه وواجبه كبرلماني.. فتلاقي في المقابل يتسربله مكالمة هاتف مع سيدة! أيوة يعني عشان هو بيكلم حريم فتبقى التعديلات حلوة!

المخرج خالد يوسف، اتسربله فيديو جنسي، ليه تحديداً معرفش، بس الظاهر إنه زعل حد ما، أو كان ناوي يزعل حد ما.. برضه في حاجة ليس لها علاقة بحقيقة الخوف على البلد أو الوطنية أو غيره.

* من فترة قال البعض أنا عندي تسريبات جنسية لمسئولين كبار في النظام الحاكم في مصر، بل قال أحدهم على صفحته إنها فيديوهات تخص السيسي نفسه! وقال البعض إنه اللواء عباس كامل! لو فكرنا في الأمر من ناحية صحيحة وسليمة.. ما دخلي في علاقات هذا أو ذاك؟

* دخل البعض في نقاش وجدال وخلاف.. هل السيسي كافر؟!

اكتفيت بجملة لو السيسي يختم القرآن في الشهر 3 مرات، ويصلي قيام الليل ويصوم الاثنين والخميس ولا يفوته فرض جماعة ودائم الذكر والاستغفار..

وأنا مالي.. ما الحاجات دي لنفسه مش ليا ولا لبلدي!

دي حياته هو.. لكن الاختلاف مع السيسي ونظامه هو إن في اللي شايف إنهم خطر على مصر وأمنها القومي.. وهم شايفين إن غيرهم هم خطر على مصر وأمنها القومي.

هل هم شايفين إن دول مجرمين وخطر عشان بتوع بنات؟!

لأ.. هم عايزين "يحكموا" من غير قلق.. من غير صوت..

حتى لو القلق ده بيعمله شاب قدام كاميرا على قناة على يوتيوب..

فخلوا بالكم كلكم.. إن انهيار أو اختفاء شخصية عبد الله الشريف أو اللي زيه.. مش هيخلي مصر تبقى أحسن.. عشان دول موضوعين مختلفين تماماً..

طيب إفرض عبد الله بقى من أكبر مؤيدي النظام..

برضه ده مش هيخلي مصر أحسن!

طيب إفرض وائل بقى مرشد الإخوان!

ده برضه مش هيخلي مصر أحسن!

اللي هيخلي مصر أحسن، إننا نسمع بعض، ونقعد مع بعض نتكلم ونحل مشاكل البلد..

وأول حد لازم يلتزم بده هم النظام ومؤيدي النظام..

عشان لو فضلنا كده.. يبقى نتكلم على مصر كمان 50 ولا 60 سنة!