أبو تريكة.. عدو التسامح ورمز الكراهية!

 

أبو تريكة مش إله.. أبو تريكة مش خط أحمر..

طبعاً أنا مقتنع بالسطرين دول مليون في المية، مفيش إنسان هيكون فوق الانتقاد، ومفيش إنسان مش بيغلط.. لكن سيبونا من الشخص ونوزن الكلام نفسه.. نتناقش في "الموضوع" ذاته.. زي كده أنا بعيداً عن اتفاقي أو اختلافي مع أ. وائل خليل.. أنا هقول رأيي في "كلامه - مواقفه" مش في شخصه.

أبو تريكة صرح مؤخراً إنه بيرفض "نشر" فعل الشذوذ الجنسي في المجتمع، واعتباره حاجة عادية أو مقبولة وطبيعي إنها تبقى موجودة وسطنا! خاصة في مجتمعاتنا العربية والإسلامية، وحذر من خطورة ده على الأبناء والأطفال والأجيال الناشئة، وإننا لازم نحمي نفسنا ونحميهم ونوعيهم إن ده مخالف لفطرة الإنسان ومخالف لتعاليم الدين الإسلامي..

وده حقنا وحق أبو تريكة.. إنت عايز تبقى حاجة معينة تعمل حاجة معينة في نفسك.. براحتك، بس أنا مش مطلوب مني إني أوافق على فعلك ده وأتقبله.. مش مطلوب مني أوافق على إنك بتشرب الخمور مثلاً، مش مطلوب مني أوافق لك وأتقبل الزنا أو تعاطي المخدرات أو الشذوذ تحت دعاوى "التسامح"!!

افعل ما شئت في حياتك.. لكن متقدرش تجبرني إني أقولك ده صح.. لا هفضل أقولك ده غلط.

أنا شخصياً بعمل ذنوب أسأل الله المغفرة، بس ده مش معناه إني أحاول أقنع الشارع كله إنهم يتقبلوني بالذنب ده وأفضل أعمل "أفضل دعاية وفعاليات" تؤثر على كل سكان الشارع ويبدأ منهم اللي يقتنع زيي ويبقى الخطأ ده شيء عادي! ولو حد قالي إنت بتعمل إيه.. ده غلط أقوله خليك متسامح!

الكراهية مش معناها إني أرفض عادات أو أفعال الآخر..

والتسامح مش معناه إني أقبل عادات أو أفعال الآخر..

ده إخلال كبير في معاني كلمة زي "التسامح".

نبي الله لوط مكانش بيكره قومه! أو بيعاندهم! مكانش صاحب خطاب كراهية وعنصرية! ومكانش صاحب فكر متحجر ولا رجعي ولا متخلف!

نبي الله لوط كان بيحب قومه جداً.. لدرجة إنه قالهم أهو السبيل الصحيح.. الرجل يتزوج من إمرأة.. وهؤلاء بناتي.. وهم أعز ما يملك الرجل.. بنته، كان عنده استعداد يصاهر منهم رجل ويوافق على زواج ابنته منه وفق التعاليم الربانية، لينقذه ويبعده عن الطريق اللي عاقبته سوء في الدنيا والآخرة.

نبي الله لوط مكانش بيكره قومه.. كان بيخاف عليهم.. بيخاف عليهم من انتكاس فطرتهم.. بيخاف عليهم من اللي ممكن يحصل لهم في الدنيا قبل الآخرة من عقاب الله عز وجل ليهم نتيجة سوء أفعالهم وقراراتهم.

الأستاذ وائل خليل في خلال 10 أيام بس.. بيعمل الحاجة وعكسها تماماً.. زي ما هو واضح في الصور من حسابه.. وده يدل بما لا يدع مجالا لشك إن النظرة هنا نظرة شخصية ضيقة جداً بتركن إلى الهوى الشخصي، يعني القضايا بتتحسم حسب مزاج الأستاذ وائل.. لا أكتر ولا أقل.

الأستاذ وائل اللي بيحيي إسبوع "التعدد".. شايف إن إزاي أبو تريكة ينكر المنكر! إزاي يقول على الغلط غلط! بيقوله قلشت منك يا تريكة!!

ونفس الأستاذ وائل اللي بيحيي إسبوع التعدد.. شايف إن "المتدينين" خم اللي بيسعوا إنهم يغيروا في الدين ويخلوا "التعدد في الزواج ضمن علاقة شرعية حلال" إن ده محاولة من المتدينين لـ"تغيير الدين" وأركان الدين!

الأستاذ وائل ضد إن الراجل يتجوز بواحدة تانية غير مراته سراً أو علناً، بموافقة الزوجة الأولى أو رغماً عنها.. ومقتنع تمام الاقتناع إن في "جهة ما" بتغسل دماغ البنات يا عيني.. عشان يوافقوا على هذا "الحلال".

الأستاذ وائل مش شايف مليارات سنوياً بتدفع من أجل الترويج للشذوذ الجنسي والعلاقات المحرمة والزواج من الحيوانات وغيرها من الأفكار الغريبة.. مش شايف غسيل مخ لمليارات البشر في كل الكوكب بيتسخدم فيها السياسة والاقتصاد والفن والصحافة والرياضة والرواية والسيما وأفلام كرتون الأطفال ومجلات الكوميك ومناهج التعليم في المدارس.

حملات قوية ومركزة لا تتوقف.. لدرجة إن الأستاذ وائل نفسه وقع "فريسة" لهذه الحملات.. وطالع يدافع عن الغلط ويحارب ويتريق على الصح.. بزعم إسبوع التعدد..

الأستاذ وائل بيألف على مزاجه إن شعار قوس قزح ده شعار التعدد والتسامح.. مش كما هو أصبح معروف ومقرون بـ الشذوذ الجنسي للأسف.

المدير الفني لفريق ليفربول يورجن كلوب.. أعلن دعمه مش لإسبوع التعدد والتسامح ورفض الكراهية.. أعلن دعمه وارتداء ألون قوس قزح دعما للاعبة شاذة جنسياً بتلعب في النادي.. يعني الهدف واضح من الفعالية.. "تطبيع مع الشذوذ"..

الأستاذ وائل.. تخيل قضية فلسطين التي تدافع عنها.. طلعت أنا أقولك.. معلش يا وائل قلشت منك.. واطلع اعتذر! إنت هتبصلي إزاي؟!

للعلم.. إحنا ممكن نعيش وفلسطين تحت الاحتلال ومن غير المسجد الأقصى لعشرات السنين.. ونبقى على العهد ونعمل على أمل استرجاعه وتحرير الأرض.. لكن مينفعش نعيش سنة واحدة وإحنا موافقين على "نشر" الشذوذ الجنسي بينا والتطبيع معاه!